„Сакаме да бидеме сигурни дека производите што се продаваат на платформата Temu ги почитуваат нормите на ЕУ и не ги изложуваат потрошувачите на ризик,“ изјави во соопштение, европската комесарка за конкуренција, Маргарет Вестагер.
Сè уште, не е одреден законски рок за завршување на истрагата. Доколку Temu се прогласи за виновен за прекршоците, компанијата може да добие казна до шест проценти од годишниот промет, според новите европски регулативи за дигитални услуги.
Компанијата Temu, која бележи брз раст во Европа благодарение на ниските цени, е меѓународна верзија на големата кинеска платформа за е-трговија Pinduoduo, формирана во 2015 година. На платформата се нудат огромен број производи, од облека, играчки, украси, алати, до напредна технологија.
Извор: Dall-E3 i Web Mind
Одговорот на Temu и предупредувањата пред истрагата
Компанијата се обврза дека ќе соработува тесно со Европската комисија.
„Temu многу сериозно ги сфаќа своите обврски поврзани со регулативите за дигитални услуги и постојано работи на заштита на интересите на потрошувачите. Целосно ќе соработуваме со регулаторните тела,“ изјави портпаролот на компанијата.
Започнувањето на истрагата од Брисел следува по бројни предупредувања и писмени барања упатени до платформата.
Истрагата ќе се однесува на системите што се воспоставени за ограничување на продажбата на производи кои не се во согласност со регулативите на ЕУ, а особено на мерките што се спроведуваат со цел да се спречи повторно појавување на непожелни трговци кои претходно биле суспендирани, објаснија од Европската комисија.
Извор: Pixabay
Испитување на ризиците по корисниците
Европската комисија, исто така, ќе ги испитува ризиците поврзани со „концептот на зависност од услуги“ на онлајн продажбата, вклучувајќи ги и програмите за награди базирани на игри кои можат да имаат „негативни последици врз физичкото и менталното здравје на корисниците.“
Комисијата ќе ги разгледа и системите за препорака на производи на корисниците и обврските на Temu да ги откријат клучните параметри што се користат во тие системи.
Европската комисија, исто така, се сомнева дека Temu не ја почитува обврската да обезбеди пристап до податоците за истражувачите.
Европските здруженија за заштита на потрошувачите во мај поднесоа жалба против Temu, обвинувајќи ја платформата дека користи измамнички објави за да ги поттикне корисниците да трошат повеќе на неа.
Регулативи за Temu
Компанијата на 11-ти октомври соопшти дека веќе презела значителни мерки од пролетта, и истакна дека ќе продолжи да ги „подобрува“ своите пракси во рамки на „регулација на дигитални услуги.“
Кон крајот на септември, шест земји од ЕУ, меѓу кои Франција и Германија, побараа од Комисијата да ги заостри регулативите во однос на Temu.
„Секој ден стотици илјади пакети пристигнуваат кај нас, главно од Кина, со производи кои не ги почитуваат прописите на европскиот пазар,“ изјави германскиот државен секретар за економија Свен Гиголд за време на состанокот со своите колеги од ЕУ во Брисел.
Извор: Bizlife.rs
